點炒好呢?

究竟點樣先可以炒股票賺到錢？有人相信畢菲特既價值投資法。有人信電視電台阿四五六叔既貼士。有人信自己既Gut Feeling。又有人會用支筆在股票圖上畫來畫去好似扶乩禁，睇下有無啟示。就我眼見，用價值投資法賺到錢既真係無幾多個。我唔係話價值投資法無用。但係我輩凡人又點睇得出一間跨國企業盤數有幾靚？份年報你真係睇得明？有無唔見得光既無擺上去先？而且個個做生意都知道，比會計師同自己睇盤數都唔同既啦。你幾時會見到公司爆煲，個會計師會走出來話個年報寫得好清楚？除非你好似畢菲特有成Team猛人幫你check數，又或你有睇透數字背後既本事。呢條王道真係唔係個個行到。
至於四五六叔既貼士，出得街就唔係貼士啦。反而學周顯話齋，你自己股票行個經紀(不過要做到Director果個)D貼士仲穩陣。
Gut Feeling - well 睇下邊個D啦。一般如你我既凡人就其實係靠估。不過我就識得朋友(佢從前做銀行investment advisor)，佢既gut feeling 就10次有8次中(係，佢已經唔使做，得閒出下埠玩好幾年喇)。不過佢即使唔使做，都對住部股票機。市值/PE對佢來講唔重要，最緊要係隻股有無得炒。我估呢D就係Malcolm Gladwell 本書Blink 所講既rapid cognition. 簡單講即係由四歲就坐著餅罐學打牌既賭仔強一睇你打隻九筒就知你叫卡窿四筒一樣。或者可以叫功多藝熟。不過都要D天份。即係你努力可以考到八級鋼琴，不過你仲要好有天份至做到郎郎。天份同中六合彩一樣，命裡有時終須有…
最後所謂技術分析。即係D財經演員成日話升穿條幾多天線變成射擊之星隻股就上望幾多幾多。就好似蘇文峰教睇相。呢D其實都係Statistic。但問題係每隻股都唔一樣，等於同卵孖生同有少少唔同，有著唔完全一樣既命運。同樣相似既走勢形態，最後結果可以很不一樣。或者俗稱所謂走勢陷阱。而要避過就似一門藝術多過一門科學。當然，有無數火箭專家都想用數學方法將佢拆解。其中AHL呢隻基金都算係其中既表表者。佢當然唔係只一種Strategy (方案) 啦。不過佢 (其實好多同類基金都有用)既 trend following strategy 我都幾有興趣。至於點解，我下次再講。